DEAR Emily,

Ayaw sana naming mag-asawang muli ang nanay namin nang namatay ang tatay 12 taon na ang nakalilipas. Pero pumayag na rin kami dahil lahat kaming anak niya ay may pamilya na at lagi na lang siyang nag-iisa sa bahay.

Ang napangasawa  niya ay kasing edad din niya, biyudo at retired na. May konting negosyo si nanay kaya hindi na namin siya pino-problema sa pamemera. Minsan, nadulas ang dila niya nang medyo nagreklamong makunat daw sa pera ang asawa niya. Maski na raw sigarilyo, sa kanya pa hinihingi.

Naisip naming magkakapatid na siguro, baka ang ipinasok lang ng bago niyang asawa sa kanilang samahan ay ang tiyan niyang parang tambol. Naaawa kami kay nanay dahil hindi siya sinwerte na nakita ang ikalawang langit niya sa lalaking ito.

Nol

BAKIT hindi mo kaibiganin itong asawa ng nanay mo para kung may problema man siya sa pera, madali mo siyang matutulungan at siya naman, pwedeng kang takbuhan kung kinakailangan.

Kung hindi naman siya katandaan, baka may mahanap siyang trabaho pa sa tulong mo o kung sino man. 

Mahirap sumakit ang ulo ng dahil sa pera. Nakaka-high blood ’yon at pwede pang pagsimulan ng away sa pamilya.

Sa una, mabuti na rin ’yong may kasama ang nanay mo sa pagtanda niya. Pero sa ikalawa naman, hindi dapat na itong naituring na kasama niya ang magpadaling magpatanda sa kanya! 

Ngayong ikaw ang mukhang nagmamalasakit sa ina mo, nararapat lang na ikaw na rin ang magplantsa sa mga kumukulot na samahan sa inyong pamilya.