Isinailalim ni Pangulong Macapagal-Arroyo ang buong Mindanao sa isang state of calamity upang magamit ng mga bayan, lungsod, at lalawigan ang limang porsyento ng kanilang badyet upang matugunan ang umiiral na krisis sa kuryente.

Sinalubong ng pangamba ang kautusan ng Pangulo dahil maaaring magamit ang bilyun-bilyong emergency funds bilang gatasan, lalo na at walang bidding sa paggamit ng pera.

Sinabi ni Cagayan de Oro City Mayor Constantino Jaraula, “although there is a chance for abuse, [people should] assume good faith” sa Pangulo.

Umaasa ang pamahalaan na ang paglalagay sa Mindanao sa state of calamity ay tutulong sa pagharap sa lumalalang problema sa kuryente sa isla, na tinatamaan ng walo hanggang 10 oras na palipat-lipat na brownout.

Si Secretary Ricardo Saludo ang nagsiwalat ng pagdedeklara ni Ms Arroyo. TJB, JMT