ILALABAS sa piitan si “Morong 43” member Carina Judilyn Oliveros upang mapasuso niya ang isang-buwang-gulang na sanggol niya.

Nilagdaan ni Judge Gina Escoto ng Morong Regional Trial Court kahapon ang utos na nagpapahintulot kay Oliveros na maisailalim sa hospital arrest sa Philippine General Hospital nang tatlong buwan, ayon kay Geneve Rivera, pinuno ng Health Alliance for Democracy.

Isa si Oliveros sa 43 health worker na inaresto sa Morong sa kaagahan ng taong ito at pinaratangang mga komunista.

Binalik si Oliveros sa Camp Bagong Diwa noong isang linggo makaraang isilang ang panganay niya. Sinama niya sa selda ang sanggol upang mapasuso ito. LB Salaverria