BEVERLY HILLS, California—Naniniwala si Manny Pacquiao na nararapat lamang bigyan ng ikalawang pagkakataon si Antonio Margarito.
Ngunit hindi kinakagat ng pound-for-pound king ang dahilan ni Margarito na hindi niya alam ang iligal na balot sa kanyang mga kamay na naging sanhi ng kanyang suspensyon dalawang taon nakararaan.
Kaiba ito sa sinasabi ni Top Rank promoter Bob Arum na naniniwalang inosente ang Mehikano. Si Arum ang promoter nina Pacquiao at Margarito.
“Of course, I believe he knew,” sabi ni Pacquiao Martes sa Beverly Hills Hotel. “He’s the one who wraps his hands. He’s just making some alibi for some reason. What do you think? My belief is you (would) know that.”
Sinabi rin ni Pacquiao na nais niyang may magbantay kay Margarito habang binabalutan ang kanyang mga kamay bago ang sapakan Nobyembre 13 sa Dallaw Cowboys Stadium.
“My concern is that we have somebody in the dressing room, someone else watching him,” wika ni Pacquiao.
Tatangkain ng kinatawan ng Sarangani na makuha ang ika-walong titulo laban kay Margarito. Paglalabanan ng dalawang mandirigma ang WBC 154-libra titulo.
Nagkamayan ang dalawang mandirigma sa kanilang unang paghaharap at tumawa pa si Pacquiao matapos tingnan ang katunggali na mas matangkad ng limang pulgada.
Si Margarito ay 5-foot-11, samantalang 5-foot-6 si Pacquiao.
Mahirap ang laban ni Pacquiao na napanalunan ang huling labindalawang sapakan kabilang ang nakakaantok na tagumpay niya kontra Joshua Clottey noong Marso.
Nasuspindi si Margarito matapos mahuli ang kanyang trainer na si Javier Capetillo na binabalutan ang kanyang kamay ng mala-plaster na bagay sa kanyang bakbakan kontra Shane Mosley noong 2009 sa Los Angeles, California. Nagwagi si Mosley.