TAIPEI — Lalapag na sa Philippine Basketball Association ang dating Ateneo Blue Eagle.

Matapos konsultahin ang kanyang pamilya at malalapit na kaibigan, pumayag na si Japeth Aguilar na lumahok sa PBA Rookie Draft Agosto 2 sa Market! Market! sa Taguig City.

Sa kasalukuyan ay nagpapakitang gilas si Aguilar, 6-foot-8, sa William Jones Cup sa Taipei. Inaasahan ring kasali si Aguilar, beterano ng NCAA Division I sa Estados Unidos, sa pambansang koponan na lalahok sa Fiba-Asia championships Agosto sa Tianjin, China.

Susundan ni Japeth ang yapak ng amang si Peter Aguilar na naglaro rin sa pambansang koponan at sa PBA.

“Gusto ko na rin maka-akyat sa susunod na level habang bata pa ‘ko,” sabi ni Aguilar sa mga kasapi ng PBA Press Corps na nasa Taipei.

Inaasahang magiging numero uno sa draft si Aguilar.

“Japeth will be the most dominant big man in the PBA ever,” sabi ni Powerade Pilipinas coach Yeng Guiao.

Sinabi ni PBA commissioner Renauld ‘Sonny’ Barrios malaki ang maiiambag ni Aguilar sa PBA.

‘‘He will be an an asset not only to his team but also to the PBA,” ani Barrios. “The PBA family welcomes Japeth to the premier basketball league of the country. I wish him all the best as I join all PBA fans in eagerly waiting for his debut in the games this coming October.”