Kung hindi mabubulilyaso, maghaharap sina World Boxing Association top-ranked challenger Drian ‘‘Gintong Kamao” Francisco at Mexican Cristian Mijares para sa koronang mababakante ni Nonito ‘‘Filipino Flash” Donaire Jr.

Sinabi ni Saved by the Bell Promotions president Elmer Anuran kahapon na malaki ang posibilidad na mangyari ang sagupaan Oktubre sa Mexico.

‘‘Handa na si Drian lumaban kahit saan,” sabi ni Anuran.

Nauna nang sinabi ni Donaire na iiwan na niya ang WBA super flyweight interim title
upang mag-kampanya sa mas mabigat na dibisyon.

Sinabi ni Donaire sa mga mamamahayag sa isang press conference na hahamunin niya ang mga kampeong sina Fernando Montiel o maging si WBA super bantamweight title holder Wilfredo Vasquez para sa titulo.

May kartadang 39 panalo(17 KOs), anim talo at pitong tabla ang 28-taon gulang na si Mijares.
Huling lumaban ang pambato ng Durango, Mexico, noong Abril 14 kung saan ay tinalo niya ang kababayang si Francisco Arce sa Palenque de la Feria, Durango.

Tangan ni  Francisco ang 19-0-1 kartada at siya ang kasalukuyang WBA No.1 challenger.